ياصاحبي هوّن على نفسك أرجاك ..
هكّ الثمينة من النصايح تجدّيك ..

خذ من أبوك اللي تعب بك وربّاك ..
خبرة تجارب لو عناها يبكّيك ..

أقطف ثمار التجربة حوف دنياك ..
وأفهم خفاياها قبل يوم تخفيك ..

وأمك إذا طاف الحزن يوم جوّاك ..
إطلب رضاها وارفق الله يهديك ..

ترى دعاها يزيل همّك وبلواك ..
يشفي جروحك لين تبرى ويقوّيك ..

واغتنم وقتك قبل تكثر خطاياك ..
خذ سجدةٍ ترضي بها وجه باريك ..

ربّ الأرباب اللي من الطين سوّاك ..
صَنَعك آيه وحط روح وجسد فيك ..

سبحانه اسجد له شكر" كان يمداك ..
لا تشري الدنيا ضميرك وتغويك ..

واللي طعن ظهرك ترى ما تعدّاك ..
يعوي يغيضه كلّ طيّب نبت فيك ..

لا تلتفتّ إلا لمثلك وشرواك ..
احذر تماشي خايس بيوم يعديك ..

ترى وديدك ما يدوّر بمخباك ..
ويفزع ليا اشتد البلا ما يخلّيك ..

ولّا ضديدك لوب تنزف حناياك ..
والله لو تطلب حصى ما يلبّيك ..

أحدن ليا من طحت قام وتلقّاك ..
وأحدن يشوفك ميت وما يدانيك ..

هذي الدنيا درب شايك بالاسلاك ..
ودّك تحاتيها مثل ما تحاتيك ..

يا صاحبي هوّن على نفسك أرجاك ..
وأصبر ترى ما غير صبرك يداويك ..

دمتم بكل خير
#شعرعلاءالغانم
مقطوعة مسائية يوم الثلاثاء 2019/12/11 م

حكمه أغلى من الذهب
‏خذ من أبيك نصيحة وافهم بها دنياك،،، وخذ من أمك دعوة واقهر بها بلواك،،، وخذ من وقتك سجدة واشكر بها مولاك.