ويوم قلت انساك لاتصدّق نسيت
طيفك الغالي معي باربع جهاتي

اعترف غلطان في حقّك وجيت
في يدي ورد اعتذاري يا غناتي

ولا هو بعيب اعتذر كاني خطيت
عيب من اخطي ولاصحّح خطاتي

كاذب ٍ لا قلت في بعدك هنيت
وصادقٍ لو قلت بك تحلى حياتي

ها كُبُر حبّك بقلبي ما دريت
ساكن ف صدري وصوتي وف سكاتي

فيك افكّر طول يومي لو صحيت
وان رقدت اتمرّني عرض ف مباتي

اعشقك شمس ف غرامك ما طفيت
عشقي الحاضر و حلم ف ذكرياتي

واعشقك راحه الى منّي بكيت
يا خشوع ولذّة القلب ف صلاتي

واعشقك عشق الوطن يومي صفيت
مغترب والشوق يحرق مفرداتي

واعشقك دمعة زعل لمّا رضيت
ضحكة ٍمخنوقة ٍحدر الشفاتي

و اعشقك اسماع ليّه لو حكيت
صيت فخر ٍحارت ف وصفك رواتي

يا غرام ٍخذت بك عمر وعطيـت
روحي وقلبي معاك ولا تحاتي

لو تفر الكون مثلي ما لقيت!
عاشق ٍيهواك و يسوّي سواتي

قد ورثت الطّيب من اهل الكويت
ووارثٍ صبر وشموخ اهل الفراتي

لو ترد عشت السعاده ما حييت
ولو تصد ماقول لك حانت وفاتــي

ابتديت العشق يمّك وانتهيت
ناثر ٍ في عاصف اشواقك رفاتي